Avropanın yeni planı təxirə düşə bilər
Avropa İttifaqı yay-qış vaxtına keçiddən imtina planını 2021-ci ilə qədər təxirə sala bilər. Novator.az-ın məlumatına görə, Avropa İttifaqına sədrlik edən Avstriya bununla bağlı məruzə hazırlayıb.
Məruzədə bildirilir ki, həmişəlik yay vaxtına keçməyin saatların ildə bir dəfə irəli, bir dəfə geri çəkilməsindən sərfəli olduğuna kifayət qədər dəlil yoxdur.
Avropa İttifaqının icra orqanı olan Avropa Komissiyası bu il yay-qış vaxtına keçid sorğusu aparıb. İyulun 5-dən avqustun 16-na qədər keçirilmiş, 4,6 milyon insanın qatıldığı sorğunun nəticələrinə görə, avropalıların 80%-i yay vaxtının saxlanmasını dəstəkləyib.
Avropa Komissiyasının hazırladığı plana görə, 2019-cu ilin oktyabrından Avropa İttifaqında saatların mövsüm üzrə dəyişməsi ləğv edilməlidir.
Avstriyanın hazırladığı yeni məruzədə isə 2026-cı ilədək standart vaxta keçid mexanizminin il boyunca necə işlədiyini nəzərdən keçirməyə çağırış yer alır. Qeyd olunur ki, Avropa İttifaqının bəzi ölkələri, o cümlədən Portuqaliya, Yunanıstan və Niderland saatların ildə iki dəfə çəkilməsi mexanizmini dəstəkləyir və ya bu qaydadan imtina etmək üçün əlavə əsaslandırma tələb edir.
Avropa İttifaqının 28 üzvü var: Almaniya, Avstriya, Belçika, Bolqarıstan, Böyük Britaniya, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan. Böyük Britaniya qurumdan çıxmaq üzrədir.
Bu məkanda hər il martın son bazar günündən əqrəblərin bir saat qabağa çəkilməsi ilə yay vaxtına keçilir, oktyabrın son bazar günündən isə əqrəblərin bir saat geri çəkilməsi ilə qış vaxtı tətbiq olunur.
Səidə Hüseynova
