Manatla əmanət və depozitlər 23,8% artıb
Mərkəzi Bank 2018-ci ilin yanvar-sentyabr ayları üzrə pul siyasəti icmalı açıqlayıb. Novator.az-ın məlumatına görə, hesabatda qeyd olunur ki, 9 ayda qeyri-nağd valyuta bazarında əməliyyatların həcmi 17,7 milyard ABŞ dolları ekvivalentində olub. Əməliyyatların 84%- i ABŞ dollarında, 16%-i digər valyutalarda aparılıb.
Bankların nağd xarici valyutanın alğı-satqısı üzrə aparılmış əməliyyatların həcmi 5 milyard ABŞ dolları ekvivalentində göstərilir. Hesabata əsasən, bunun 78%-ni ABŞ dolları ilə əməliyyatlar təşkil edib.
Yanvar-sentyabr ayları ərzində Mərkəzi Bank 75 valyuta hərracı keçirib, Dövlət Neft Fondu 4 milyard 289,4 milyon ABŞ dolları dəyərində valyuta satıb.
9 ayda manat ABŞ dollarına qarşı 0,01%, Türkiyə lirəsinə qarşı 58,3%, avroya qarşı 2,6%, İngiltərə funt sterlinqinə qarşı 2,9%, Rusiya rubluna qarşı 13,9% möhkəmlənib.
Milli valyutada əmanət və depozitlər 23,8% artıb, xarici valyutada isə 2,5% azalıb.
9 ayın sonuna ölkənin strateji valyuta ehtiyatları 45,1 milyard ABŞ dolları təşkil edib, xarici dövlət borcunu 3 dəfə üstələyib.
