Uşaqların qorunması qanunu imzalanıb
Dövlət başçısı İlham Əliyev uşaqların zərərli informasiyadan qorunması qanununu imzalayıb. Novator.az-ın məlumatına görə, 2020-ci il yanvarın 1-dən qüvvəyə minən qanunda uşaqların zərərli informasiyadan qorunmasının əsas prinsipləri belə sıralanır: uşaqların mənafelərinin üstün tutulması, onların hüquq və azadlıqlarının təmin olunması; uşaqların həyat və sağlamlığı üçün təhlükəsiz olan, onların hərtərəfli inkişafını və sosiallaşmasını təmin edən informasiya məhsullarının dövriyyəsinə şəraitin yaradılması; zorakılığın, qəddarlığın, narkotik vasitələrin və psixotrop maddələrin, alkoqollu içkilərin və tütün məmulatlarının, cəmiyyət əleyhinə davranışın, pornoqrafik xarakterli informasiyanın təbliğinin yolverilməzliyi; zərərli informasiya məhsullarının dövriyyəyə daxil edilməsinin, o cümlədən informasiya texnologiyalarından istifadə etməklə uşaqlara qarşı törədilən hüquqpozmaların qarşısının alınması; uşaqların zərərli informasiyadan qorunması sahəsində beynəlxalq əməkdaşlığın həyata keçirilməsi.
Uşaqlar arasında dövriyyəsi qadağan edilən informasiyaya zorakılığı və qəddarlığı təbliğ edən informasiya; cəmiyyət əleyhinə və hüquqazidd hərəkətləri, o cümlədən cinayətləri təbliğ edən informasiya; uşaqların həyat və təhlükəsizliyinə potensial təhlükə yaradan əməlləri təbliğ edən informasiya; ailə institutunu nüfuzdan salan informasiya; əxlaqdan kənar leksik (söyüş) məzmunlu informasiya; pornoqrafik xarakterli informasiya aiddir.
Telekommunikasiya xidmətləri göstərən fiziki və hüquqi şəxslər uşaqların zərərli informasiyadan qorunması üçün tədbirlər görməlidirlər. Uşaqların ola biləcəyi yerlərdə onların zərərli informasiyadan qorunması üçün müvafiq tədbirlər texniki proqram və avadanlıq vasitələrinin tətbiqi ilə həyata keçirilir.
İnternet informasiya ehtiyatlarında informasiya məhsulunun uşaqlar arasında yayılmasını məhdudlaşdıran xəbərdarlıq mətni əks olunmalıdır.
Qanunun icrasına nəzarət dövlət və ictimai nəzarət formalarında həyata keçirilir.
