Müsavatçı gənc nədə ittiham olunur?
Müsavatçı Gənclər Təşkilatının sədri Əbülfəz Sadıqlı həbs olunub. Noyabrın 21-də Səbail Rayon Məhkəməsi onun barəsində 3 aylıq həbs qətimkan tədbiri seçib. “Azadlıq” radiosunun məlumatına görə, gənc fəala dələduzluq və saxta sənəd hazırlayıb ondan istifadə etmək ittihamı verilib.
İttihama əsasən, Əbülfəz Sadıqlı yol polisinə “Nikoyl” bankının krediti ilə aldığı “Niva” markalı avtomobilə görə borclu qaldığı 5 min 100 manatın ödənməsi barədə saxta arayış təqdim edərək maşını öz mülkiyyətinə keçirib, daha sonra satıb.
Əbülfəz Sadıqlının qardaşı Vasif Sadıqbəyli “Azadlıq” radiosuna deyib ki, arayış bankdan alınıb: “Bankın möhürü Əbülfəzdə nə gəzirdi ki, belə arayış da hazırlaya bilsin? Ekspertizanın da rəyi var ki, sənəddəki möhür də, imza da saxta deyil, bircə reyestr-qeydiyyat nömrəsi uyğun gəlmir. Araşdırmalıdırlar ki, o sənədi bankda kim hazırlayıb. Əgər arayış saxta olubsa, bu üç il ərzində niyə bank tələb etməyib ki, borcunu ödəsin, niyə məhkəməyə müraciət etməyib? Deməli, həqiqətən Əbülfəz pulu banka ödəyib və arayışı alıb”.
Əbülfəz Sadıqlının vəkili Mirismayıl Hadıyev “Azadlıq” radiosuna deyib ki, müvəkkilinə ittihamların irəli sürülməsi üçün yetərincə sübut yoxdur: “Əbülfəz Sadıqlı özü də məhkəmədə təqsirsiz olduğunu dedi. Bildirdi ki, ona qarşı qərəz var. Hesab edirəm ki, ittihamlar və həbs üçün kifayət qədər əsaslar yoxdur. Hərtərəfli araşdırma aparmadan, yalnız şübhə ilə adamı həbs eləmək olmaz”.
Vəkil müsavatçı fəal haqqında həbs qərarından apellyasiya şikayəti verəcəyini bildirib.
