Əmlak Məsələləri Dövlət Komitəsi noyabrın 22-si Lənkəranda “Kütləvi çıxarış” kampaniyası keçirib, Liman şəhəri və Şirin Su kəndindən olan 100-ə yaxın vətəndaşa qeydiyyat xidmətləri göstərib.
Rəsmi məlumata görə, 60-a yaxın sakinə torpaq sahələrinə dair hazır çıxarışlar, torpaq sahəsinin planı və ölçü sənədləri təqdim olunub. Səyyar ofisdə sakinlərin daşınmaz əmlakla bağlı sualları cavablandırılıb, onlara hüquqi məsləhətlər verilib. Torpaq sahəsi, fərdi yaşayış evi və mənzil kimi daşınmaz əmlakları qeydiyyata almaq istəyən 40-a yaxın vətəndaşa qeydiyyat prosesi izah olunub, onlardan ilkin sənədlər qəbul edilib.
