Aşqabad ziyarətləri
Türkmənistan səfərinə çıxan prezident İlham Əliyev noyabrın 21-i paytaxt Aşqabadda “Xalq xatirəsi” memorial kompleksini ziyarət edib. Kompleksdə 1948-ci ildə baş vermiş zəlzələ zamanı həyatlarını itirmiş və Göytəpə döyüşlərində şəhid olmuş insanların xatirəsinə abidələr ucaldılıb.
AZƏRTAC-ın arayışına görə, “Vətən müqəddəsliyi” muzeyində 1881-ci ildə baş vermiş Göytəpə döyüşlərinin maketi quraşdırılıb, Göytəpə qalası, həmin döyüşlərin qəhrəmanları, döyüşlər zamanı istifadə olunan silah və libaslar, digər eksponatlar nümayiş olunur.
Muzeyin növbəti bölməsi 1948-ci ildə Aşqabadda baş verən zəlzələyə həsr olunub. Burada həmin zəlzələ zamanı dağılan binaların qalıqları təqdim edilir.
Türkmənistanın inkişafına həsr olunan bölmədə müasir Aşqabadın görkəmini əks etdirən fotolar yer alır.
İlham Əliyev sonra Aşqabad Olimpiya Kompleksi ilə tanış olub. Ümumi ərazisi 157 hektar olan olimpiya kompleksində 30-dan çox müxtəlif təyinatlı idman qurğusu, həmçinin 45 min tamaşaçı tutumu olan stadion, paralimpiya kompleksi və tibbi bərpa mərkəzi yerləşir.
Həmin gün prezident Türkmən Milli Xalça Muzeyinə də baş çəkib. Muzeydə 2 mindən çox xalça nümunəsi toplanıb. Onların arasında əllə toxunan ən böyük xalça kimi Ginnesin rekordlar kitabına düşmüş, ümumi sahəsi 301 kvadratmetr olan “Altın asır” xalçası da var.
