2020-ci ilin yolu açılır
Dekabrın 2-si İrlandiyanın paytaxtı Dublində 2020-ci ilin Avropa futbol çempionatının seçmə mərhələsinin püşkü atılacaq. 55 milli komandanın 10 qrupa bölünəcəyi seçmə raundun püşkü üçün səbətlər belə müəyyənləşib:
1-ci səbət – İsveçrə, Portuqaliya, Hollandiya, İngiltərə, Belçika, Fransa, İspaniya, İtaliya, Xorvatiya, Polşa
2-ci səbət – Almaniya, İslandiya, Bosniya, Ukrayna, Danimarka, İsveç, Rusiya, Avstriya, Uels, Çexiya
3-cü səbət – Slovakiya, Türkiyə, İrlandiya, Şimali İrlandiya, Şotlandiya, Norveç, Serbiya, Finlandiya, Bolqarıstan, İsrail
4-cü səbət – Macarıstan, Rumıniya, Yunanıstan, Albaniya, Monteneqro, Kipr, Estoniya, Sloveniya, Litva, Gürcüstan
5-ci səbət – Makedoniya, Kosovo, Belarus, Lüksemburq, Ermənistan, Azərbaycan, Qazaxıstan, Moldova, Cəbəllütariq, Farer adaları
6-cı səbət – Latviya, Lixtenşteyn, Andorra, Malta, San Marino.
Seçmə mərhələ 2019-cu ilin martında start götürəcək. Qruplarda ilk iki yeri tutan milli komandalar final raunduna adlayacaq.
Qalan dörd vəsiqə Millətlər Liqası üzrə müəyyənləşir. Millətlər Liqası Avropa çempionatının final mərhələsinə hər diviziondan bir vəsiqə verir. Bunun üçün 2020-ci ilin martında qrup qalibləri arasında əlavə matçlar keçiriləcək.
A divizionu qruplarında Hollandiya, İsveçrə, Portuqaliya və İngiltərə, B divizionu qruplarında Ukrayna, İsveç, Bosniya və Danimarka, C divizionu qruplarında Şotlandiya, Finlandiya, Norveç və Serbiya, D divizionu qruplarında Gürcüstan, Belarus, Kosovo və Makedoniya qalib olublar. Qrup qalibi Avropa çempionatına həmin turnirin özünün seçmə mərhələsindən düşərsə, onu Millətlər Liqasının növbəti ən yaxşı komandası əvəzləyəcək.
2020-ci ilin Avropa çempionatının final mərhələsi 12 şəhərdə, o cümlədən Azərbaycan paytaxtında keçiriləcək. Bakı Olimpiya Stadionu 3 qrup oyununa, 1 dörddə bir finala ev sahibliyi edəcək.
