Büdcə paketində nələr var?
Noyabrın 13-də Milli Məclis büdcə paketinin müzakirəsinə başlayıb. Üç gün davam edəcək iclasda 2019-cu ilin dövlət büdcəsi haqqında, Dövlət Sosial Müdafiə Fondunun 2019-cu il büdcəsi haqqında, işsizlikdən sığorta fondunun 2019-cu il büdcəsi haqqında, 2019-cu il üçün yaşayış minimumu haqqında, 2019-cu il üçün ehtiyac meyarının həddi haqqında, Milli Məclisin və Hesablama Palatasının 2019-cu il üçün xərclər smetası haqqında layihələrə baxılacaq.
Azərbaycanın 2019-cu il büdcəsinin layihəsində gəlirlər 22 milyard 917,5 milyon manat nəzərdə tutulub. Novator.az bildirir ki, bu istiqamət üzrə ilk sırada Dövlət Neft Fondundan köçürmə dayanır: proqnoz 11 milyard 364,3 milyon manatdır.
Büdcə layihəsində əlavə dəyər vergisindən 4 milyard 97,6 milyon manat, hüquqi şəxslərin mənfəət (gəlir) vergisindən 2 milyard 670,4 milyon manat, fiziki şəxslərin gəlir vergisindən 880 milyon manat daxilolma proqnozlaşdırılır.
Aksizlər üzrə gəlir proqnozu 927 milyon manat, gömrük rüsumları üzə 801 milyon manat, sadələşdirilmiş vergi üzrə 322 milyon manat göstərilir.
Layihəyə əsasən, hüquqi şəxslərin əmlak vergisindən 211 milyon manat, torpaq vergisindən 45 milyon manat gəlir olacaq.
Mədən vergisindən 133 milyon manat, yol vergisindən 114 milyon manat daxilolma nəzərdə tutulur.
Büdcə təşkilatlarının ödənişli xidmətlərindən 626,6 milyon manat, dövlət rüsumundan 190 milyon manat əldə etmək planı var.
2019-cu il büdcəsinin layihəsində xərclər 24 milyard 780,1 milyon manat nəzərdə tutulub. Müdafiəyə 3 milyard 37,6 milyon manat ayrılması planlaşdırılıb. Təhsil xərcləri layihədə 2 milyard 274,6 milyon manat, səhiyyə xərcləri 1 milyard 48,3 milyon manat, sosial müdafiə və sosial təminat xərcləri 2 milyard 553,4 milyon manat göstərilib.
Sənaye, tikinti və faydalı qazıntılar üzrə xərclər 6 milyard 844,7 milyon manat həcmində proqnozlaşdırılıb.
Dövlət Sosial Müdafiə Fondunun gəlirləri və xərcləri 3 milyard 928 milyon 104 min manat, işsizlikdən sığorta fondunun 2019-cu il büdcəsinin gəlirləri və xərcləri 83 milyon 451 min 400 manat nəzərdə tutulur.
Layihəyə görə, 2019-cu il üçün yaşayış minimumu ölkə üzrə 180 manat, əmək qabiliyyətli əhali üçün 191 manat, pensiyaçılar üçün 149 manat, uşaqlar üçün 160 manat məbləğində müəyyən edilir.
Ünvanlı dövlət sosial yardımının təyin edilməsi məqsədilə 2019-cu il üçün ehtiyac meyarının həddi 143 manat məbləğində götürülür.
