Tərcümə Mərkəzinin adı dəyişib
Tərcümə Mərkəzinin adında dəyişiklik edilib. Prezident İlham Əliyevin fərmanı ilə qurum Azərbaycan Dövlət Tərcümə Mərkəzi adı alıb.
Novator.az-ın məlumatına görə, Tərcümə Mərkəzi 2014-cü ilin mayında icra hakimiyyəti orqanı statusu ilə yaradılıb. O zaman Nazirlər Kabineti yanında Tərcümə Mərkəzi adlandırılan qurum 2016-cı ilin noyabr ayında publik hüquqi şəxsə çevrilib.
Tərcümə Mərkəzi dövlət dilindən düzgün istifadə və tərcümə işinin mərkəzləşdirilmiş qaydada təşkilini və tənzimlənməsini, Azərbaycan ədəbiyyatının beynəlxalq aləmdə, xarici ədəbiyyatın Azərbaycanda tanıdılmasını və təbliğini həyata keçirir.
Yarandığı gündən quruma Afaq Məsud rəhbərlik edir. Hazırda o, İdarə Heyətinin sədridir.
Prezident İlham Əliyev noyabrın 1-də Azərbaycan dilinin qorunması və dövlət dilindən istifadənin təkmilləşdirilməsi tədbirlərinə fərman verib. Fərmanla Nazirlər Kabinetinə Dövlət Dil Komissiyası yanında Monitorinq Mərkəzi publik hüquqi şəxs yaratmağı tapşırıb. Dövlət büdcəsindən maliyyələşən mərkəz dövlət dilinin tətbiqinə nəzarətlə məşğul olacaq, kütləvi informasiya vasitələrində, internet resurslarında və reklam daşıyıcılarında ədəbi dil normalarının qorunmasını təmin edəcək.
Dövlət Dil Komissiyasına prezident sədrlik edir. Onun 4 müavini var: Mehriban Əliyeva (birinci vitse-prezident), Ramiz Mehdiyev (Prezident Administrasiyasının rəhbəri), Akif Əlizadə (AMEA-nın prezidenti), Anar Rzayev (Azərbaycan Yazıçılar Birliyinin sədri).
