Qarabağ mitinqinə niyə icazə verilmədi?
Bir qrup ictimai-siyasi xadimin yaratdığı Qarabağ Komitəsinin sədri, müharibə veteranı İlham İsmayıl noyabrın 1-də Bakı Şəhər İcra Hakimiyyətinə dəvət olunub. Novator.az-ın məlumatına görə, Bakı Şəhər İcra Hakimiyyəti Başçısı Aparatının ictimai-siyasi və humanitar məsələlər şöbəsinin müdiri Zaur Ramazanov İlham İsmayıla noyabrın 24-nə təyin olunmuş mitinqə şərait yaratmaqdan imtina məktubu təqdim edib.
Qarabağ Komitəsi sentyabrın 29-u Yasamal rayonundakı İdman-Sağlamlıq Kompleksinin stadionunda Azərbaycan torpaqlarının işğaldan azad edilməsi tələbi ilə aksiya keçirib. Analoji aksiya noyabrın 24-nə təyin olunub, Bakı Şəhər İcra Hakimiyyətinə müraciət ünvanlanıb.
Bakı Şəhər İcra Hakimiyyətinin noyabrın 1-də təqdim olunan imtina məktubunda qeyd olunur ki, prezident İlham Əliyev Azərbaycanın ərazi bütövlüyünün təmin olunması üçün ölkə daxilində və beynəlxalq miqyasda ciddi iş aparır, Qarabağ məsələsi ilə bağlı danışıqlar şəffaf aparılır, KİV-ə təfsilatı ilə açıqlanır: “Qeyd olunanlar nəzərə alınaraq 24 noyabr 2018-ci ilə planlaşdırdığınız mitinqin keçirilməsi məqsədəuyğun hesab edilmir”.
Qarabağ Komitəsi noyabrın 8-də ATƏT-in Minsk qrupunun həmsədr ölkələrinin Bakıdakı səfirlikləri qarşısında piketlər keçirmək niyyətindədir.
1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ilin mayında atəşkəslə dayanan müharibədə Ermənistan Dağlıq Qarabağı və onun ətrafındakı 7 rayonu işğal edib.
Münaqişənin dinc yolla tənzimlənməsi üçün 1992-ci ildə yaradılan ATƏT-in Minsk qrupunda Azərbaycan və Ermənistanla yanaşı ABŞ, Rusiya, Fransa (həmsədrlər), Belarus, Almaniya, İtaliya, İsveç, Finlandiya, Türkiyə təmsil olunur.
