Mikayıl Müşfiq məsələsi ilə bağlı tapşırıqlar
Şair Mikayıl Müşfiqin qalıqlarının tapılması haqqında yayılan materialları araşdıran işçi qrup noyabrın 1-də Prezident Administrasiyasının rəhbəri Ramiz Mehdiyevin yanında ilk iclasını keçirib.
1908-ci ildə Bakı şəhərində doğulmuş Mikayıl Müşfiq 1938-ci ildə repressiya qurbanı olub. Bu yaxınlarda İosif Stalin hakimiyyəti illərində (1924-1953) repressiyaya uğramış şəxslərin bir qisminin basdırıldığı Qaradağ rayonunun Puta qəsəbəsində aparılan axtarış işlərinin gedişində Mikayıl Müşfiqin güman edilən qalıqları aşkarlanıb.
Prezidentin ictimai-siyasi məsələlər üzrə köməkçisi Əli Həsənov oktyabrın 31-də açıqlamaya yayaraq deyib ki, Mikayıl Müşfiqin qalıqlarının tapılması ilə bağlı materiallar prezident İlham Əliyevin diqqətini cəlb edib və o, məsələnin araşdırılması üçün ibarət işçi qrupun yaradılması barədə göstəriş verib.
İşçi qrupun 1 noyabr iclasında prezidentin ictimai-siyasi məsələlər üzrə köməkçisi Əli Həsənov, Prezident Administrasiyasının humanitar siyasət məsələləri şöbəsinin müdiri Fərəh Əliyeva, Milli Elmlər Akademiyasının prezidenti Akif Əlizadə, səhiyyə naziri Oqtay Şirəliyev, mədəniyyət naziri Əbülfəs Qarayev, Dövlət Təhlükəsizliyi Xidmətinin rəisi Mədət Quliyev, AMEA-nın vitse-prezidenti İsa Həbibbəyli, AMEA-nın Tarix İnstitutunun direktoru Yaqub Mahmudov, Milli Arxiv İdarəsinin rəisi Əsgər Rəsulov və Yazıçılar Birliyinin katibi Çingiz Abdullayev iştirak ediblər.
İşçi qrupuna Mikayıl Müşfiqin qalıqlarının aşkar edilməsi ilə bağlı məlumatların öyrənilməsi, müvafiq arxiv materiallarının araşdırılması, şairə məxsus olduğu ehtimal edilən qalıqların DNK analizinin keçirilməsi və digər zəruri tədbirlərin görülməsi ilə əlaqədar tapşırıqlar verilib.
