Prezident Mikayıl Müşfiq məsələsini nəzarətə götürüb
Prezidentin ictimai-siyasi məsələlər üzrə köməkçisi Əli Həsənov şair Mikayıl Müşfiqlə bağlı açıqlama yayıb.
1908-ci ildə Bakı şəhərində doğulmuş Mikayıl Müşfiq (İsmayılzadə) 1938-ci ildə repressiya qurbanı olub. Bu yaxınlarda İosif Stalin hakimiyyəti illərində (1924-1953) repressiyaya uğramış şəxslərin bir qisminin basdırıldığı Qaradağ rayonunun Puta qəsəbəsində aparılan axtarış işlərinin gedişində Mikayıl Müşfiqin güman edilən qalıqları aşkar edilib.
Oktyabrın 31-də açıqlamaya yayan Əli Həsənov deyib ki, Mikayıl Müşfiqin qalıqlarının tapılması ilə bağlı materiallar prezident İlham Əliyevin diqqətini cəlb edib: “Cənab prezident məsələnin araşdırılması üçün Milli Elmlər Akademiyası, Səhiyyə, Mədəniyyət nazirlikləri və digər əlaqədar qurumların nümayəndələrindən ibarət işçi qrupun yaradılması barədə göstəriş verib. Tapşırığa əsasən, Mikayıl Müşfiqə məxsus olduğu ehtimal edilən qalıqlar müvafiq qaydada DNK ekspertizasından keçiriləcək. Əgər qalıqların həqiqətən ona məxsus olduğu təsdiqini taparsa, şairin yenidən dəfn olunması ilə bağlı bütün zəruri tədbirlər görüləcək”.
