Gürcüstanın Mərkəzi Seçki Komissiyası oktyabrın 28-də keçirilmiş prezident seçkisinin ilkin rəsmi nəticələrini bəyan edib. Novator.az-ın məlumatına görə, 25 namizədin qatıldığı seçkidə ikinci tura Salome Zurabişvili ilə Qriqol Vaşadzenin çıxdığı bəyan edilib.

Müstəqil namizəd, hakim Gürcü Arzusu – Demokratik Gürcüstan Partiyasının dəstəklədiyi deputat Salome Zurabişvili ilk turda 38,64 faiz, Vahid Milli Hərəkat Partiyasının üzvü, “Güc birlikdədir” müxalif hərəkatının dəstəklədiyi Qriqol Vaşadze 37,74 faiz səs toplayıb.

İkinci tur rəsmi nəticələr təsdiqləndikdən sonra təyin olunacaq.

1952-ci il təvəllüdlü Salome Zurabişvili 2004-2005-ci illərdə, 1958-ci il təvəllüdlü Qriqol Vaşadze 2008-2012-ci illərdə xarici işlər naziri olub.

Gürcüstanda 6 il müddətinə seçilən prezident dövlət başçısı funksiyasını yerinə yetirir, icra hakimiyyətinə isə baş nazir rəhbərlik edir.