Bakıda forum gedir
Oktyabrın 25-i Bakıdakı Heydər Əliyev Mərkəzində VI Bakı Beynəlxalq Humanitar Forumu işə başlayıb. AZƏRTAC xəbər verir ki, prezident İlham Əliyev rəsmi açılış mərasimində çıxış edib.
“Yeni dünya və yeni insan formalaşdıraq: kreativlik və insan inkişafı” mövzusunda keçirilən foruma 86 ölkə və 24 beynəlxalq təşkilatdan 581 nümayəndə qatılıb.
2010-cu ildən təşkil olunan tədbirin təşəbbüsçüləri Azərbaycan və Rusiya prezidentləridir. Forum qlobal xarakterli məsələlərə dair geniş spektrli dialoqlar, fikir mübadilələri və müzakirələr aparmaq məqsədilə müxtəlif ölkələrdən tanınmış dövlət xadimlərini, elmin fərqli sahələri üzrə Nobel mükafatı laureatlarını və nüfuzlu beynəlxalq təşkilatların rəhbərlərini, o cümlədən dünyanın siyasi, elmi və mədəni elitasının nümayəndələrini bir araya toplayır.
