Ermənistan hökumətinin başçısı Nikol Paşinyan Yerevanla Bakı arasında operativ əlaqənin detallarını açıqlayıb. Novator.az-ın məlumatına görə, oktyabrın 24-ü parlamentdə çıxış edən baş nazir əvəzi deyib ki, faktiki olaraq hər gün Azərbaycan prezidenti İlham Əliyevlə əlaqə saxlayıb Ermənistan-Azərbaycan sərhədində, təmas xəttində insidentlərin aradan qaldırılması məsələsini müzakirə edir.

Nikol Paşinyan operativ əlaqə zamanı Dağlıq Qarabağ münaqişəsinin tənzimlənməsi məsələsinin müzakirə olunmadığını vurğulayıb: “Operativ əlaqə bizə insidentlərin səbəblərini müzakirə və təhlil etmək imkanı verir”.

Sentyabrın 28-i Düşənbədə İlham Əliyevlə Nikol Paşinyan arasında söhbət olub. Onlar Dağlıq Qarabağ münaqişəsinin nizamlanmasına, tərəflərin təmas xəttində, eləcə də sərhəddə insidentlərin qarşısının alınması üçün atəşkəs rejiminin möhkəmlənməsinə dair danışıqlar prosesinə sadiq olduqlarını bildiriblər, müvafiq strukturlar arasında operativ əlaqə qurulması üçün mexanizmlərin yaradılmasını qərara alıblar.

Ermənistan Azərbaycan ərazisinin bir hissəsini – Dağlıq Qarabağ bölgəsini (Xankəndi şəhəri, Şuşa, Xocalı rayonları tam, Xocavənd rayonu, keçmiş Ağdərə rayonu qismən) və onun ətrafındakı bölgələri (Laçın, Kəlbəcər, Qubadlı, Zəngilan rayonları tam, Ağdam, Füzuli, Cəbrayıl rayonları qismən), eləcə də Qazax rayonunun 7, Naxçıvan Muxtar Respublikasının 1 kəndini 25 ildir işğal altında saxlayır.

1994-cü ilin may ayından atəşkəs rejimi qüvvədədir.