Narkotiklərlə bağlı statistika açıqlanıb
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupu bu ilin doqquz ayının nəticələrini açıqlayıb. AZƏRTAC-a verilən məlumata görə, hüquq mühafizə orqanları doqquz ayda narkotiklərlə mübarizə sahəsində 2641 fakt aşkar edib: “Qanunsuz dövriyyədən ümumi çəkisi 2 ton 179 kiloqram 111,716 qram müxtəlif növ narkotik vasitə çıxarılıb, o cümlədən 10 min 140 çətənə kolu müsadirə olunub.
Daxili İşlər Nazirliyinin təşkilatçılığı, Ekologiya və Təbii Sərvətlər, Kənd Təsərrüfatı nazirliklərinin, Dövlət Sərhəd Xidmətinin və digər aidiyyəti qurumların iştirakı ilə 421 hektar 46 sot ərazidən 132 ton 165 kiloqram 418 qram (248 min 802 ədəd) narkotik tərkibli bitki yaşıl kütlə halında yığılaraq məhv edilib.
1841 nəfər cinayət məsuliyyətinə cəlb olunub. Onların 48 nəfəri xarici ölkə vətəndaşlarıdır.
Səhiyyə Nazirliyinin Respublika Narkoloji Mərkəzində 2017-ci il dekabrın 31-dək 30 min 131 nəfər qeydiyyatda olub. Onlardan 25 min 139-u dispanser, 4992 nəfəri profilaktik qeydiyyatda olanlardır. Ötən il 2115 nəfər yeni qeydiyyata götürülüb, 1432 nəfər qeydiyyatdan çıxarılıb.
Bu ilin üçüncü rübündə Daxili İşlər Nazirliyinin Respublika Narkoloji Mərkəzinə göndərdiyi 22 min 986 nəfər tibbi müayinədən keçib. Onlardan 2751-i narkotik vasitələrin istifadəsinə görə müayinə olunub, 1396 istifadəçi aşkarlanaraq qeydiyyata götürülüb”.
