Ermənistan hökuməti Seçki Məcəlləsinə və uyğun qanunlara dəyişikliklər layihəsini təsdiqləyərək parlamentin müzakirəsinə göndərib. Parlament qanunlar paketinə oktyabrın 22-də baxmalıdır.

Novator.az-ın məlumatına görə, layihə parlament seçkisində ərazilərdən namizəd vermək qaydasının ləğvini nəzərdə tutur. Partiya və blok seçkidə ölkə üzrə vahid namizəd siyahısı təqdim etməlidir.

Başqa bir təklifə əsasən, partiya və ya blokun namizədlərinin azı 30 faizi qadınlar olmalıdır.

Parlamentə keçid həddini partiyalar üçün 5 faizdən 4 faizə, bloklar üçün 7 faizdən 6 faizə endirmək təklif edilir.

Digər təklifə görə, heç bir qüvvə parlament üzvlərinin 54 faizi qədər mandat almasa, yeni seçki keçirilir. Həmçinin müxalifət parlamentdə azı dörd qüvvə ilə təmsil edilməli, onun mandatlarının sayı deputatların üçdə birindən az olmamalıdır (Ermənistan Konstitusiyasına görə, parlamentin deputatlarının sayı azı 101 nəfərdir).

Layihədə seçki depozitini minimum əməkhaqqının 7500 mislinə (indi 10000 mislidir) endirmək təklifi yer alır. Partiya və ya blok 2 faiz səs toplayarsa, depozit geri qaytarılacaq. Hazırda bundan ötrü 4 faiz səs toplamaq gərəkdir.