Qızılağac Milli Parkında insident: əməkdaşlara atəş açılıb
Oktyabrın 2-də Ekologiya və Təbii Sərvətlər Nazirliyinin mətbuat xidməti Qızılağac Milli Parkında brakonyerin park əməkdaşlarına atəş açdığı barədə məlumat yayıb.
Məlumatda deyilir: “Qızılağac Milli Parkının ərazisinə icazəsiz daxil olan və ova cəhd edən şəxs xidməti vəzifələrini yerinə yetirən parkın əməkdaşlarına atəş açaraq hadisə yerindən qaçıb. Hadisə oktyabrın 1-i gecə saatlarında baş verib.
Milli parkın mühafizə yegerləri əraziyə icazəsiz daxil olmuş şəxsin saxlanılması məqsədilə reyd keçirərkən milli park əməkdaşlarının qanuni tələblərinə tabe olmayan brakonyer mühafizə yegerləri Arif Cəfərov və Böyükişi Qaraşova bilərəkdən ov tüfəngindən atəş açıb və onları yaralayıb. Yegerlər xəstəxanaya aparılılarb və onlara tibbi yardım göstərilib.
Faktla bağlı rayon polis şöbəsinə məlumat verilib.
Aparılan araşdırmalar nəticəsində mühafizə yegerlərini yaralayaraq hadisə yerindən qaçmış brakonyerin Masallı rayonunun Köçəkli kənd sakini İlqar Səmədov olduğu müəyyən edilib və o, hüquq mühafizə orqanlarının keçirdiyi əməliyyat-axtarış tədbirləri nəticəsində saxlanılıb.
Faktla bağlı təhqiqat aparılır”.
