9 ayda Gürcüstanı 6,7 milyon əcnəbi ziyarət edib
Gürcüstanın Milli Turizm Administrasiyası ölkəyə 2018-ci ilin 9 ayında səfər etmiş əcnəbilərin sayını açıqlayıb. Novator.az-ın məlumatına görə, yanvar-sentyabr aylarında Gürcüstanı ümumilikdə 6,7 milyon əcnəbinin ziyarət etdiyi bildirilir. Qeyd olunur ki, ziyarətçilərin sayı 2017-ci ilin eyni dövrü ilə müqayisədə 11,2% artıb.
3,7 milyon nəfərin Gürcüstana turizm məqsədilə gəldiyi, turist sayında 2017-ci ilin yanvar-sentyabr aylarına nisbətdə 17,7% artım olduğu vurğulanır.
Milli Turizm Administrasiyasının məlumatına əsasən, 9 ayda Gürcüstana ən çox Rusiya, Azərbaycan, Türkiyə və Ermənistandan gəliblər.
Rəsmi statistikaya görə, 2018-ci ilin yanvar-avqust aylarında Azərbaycana 1 milyon 976,9 min (ötən ilin müvafiq dövrü ilə müqayisədə 8,5 faiz çox) əcnəbi gəlib. Onların 31,6 faizi Rusiya, 19,5 faizi Gürcüstan, 9,8 faizi Türkiyə, 9,4 faizi İran, 3,5 faizi Birləşmiş Ərəb Əmirlikləri, 2,6 faizi İraq, 2 faizi Ukrayna, 21,5 faizi digər ölkələrin vətəndaşları, 0,1 faizi vətəndaşlığı olmayan şəxslərdir.
Səidə Hüseynova
