Ermənistan hərbi xərclərini artırır
Ermənistan 2019-cu ildə hərbi xərclərini artırmaq istəyir. Novator.az-ın məlumatına görə, hökumətin gələn il üçün hazırladığı dövlət büdcəsi layihəsində müdafiə sektoruna 307 milyard dram (626,3 milyon dollar) ayrılır.
2018-ci ilin büdcəsində hərbi xərclər 246,8 milyard dram həcmindədir.
Ermənistan hökuməti 2019-cu ilin dövlət büdcəsi layihəsini sentyabrın 27-də təsdiqləyib. Parlamentin müzakirəsinə göndərilən layihədə büdcənin gəlirləri 1,5 trilyon dram, xərcləri 1,6 trilyon dram göstərilir (1 dollar 480 drama bərabərdir).
Proqnoza əsasən, gələn il Ermənistanda 4,9%-lik iqtisadi artım, 2,7%-lik inflyasiya qeydə alınmalıdır.
Minimum əməkhaqqını 55 min dram (115 dollara yaxın) həcmində saxlamaq planlaşdırılır.
Pensiyaların orta məbləğini 39 min 400 dramdan 40 min 200 drama (85 dollara yaxın) qaldırmaq nəzərdə tutulur.
İmkansız ailələrə müavinətin orta məbləği dəyişmir: 31 min 400 dram (65 dollara yaxın).
İkinci uşağa görə müavinət isə 50 min dramdan 150 min drama (310 dollara yaxın) yüksəlir.
