Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin əməkdaşları brakonyerliyə qarşı mübarizə məqsədilə reydlər keçiriblər.

Ekologiya və Təbii Sərvətlər Nazirliyinin mətbuat xidmətindən Novator.az-a verilən məlumata görə, reydlər zamanı Biləsuvar  rayonunun Platina, Saatlı rayonunun Muğan ərazilərində, Uludüz və Ağzıbir ovçuluq təsərrüfatlarında icazəsiz ova cəhd edən Cəlilabad rayon sakinləri Səfər Əhədov, Çingiz Əliyev, Qətər vətəndaşı Məhəmməd Xələf Kaabi, Şamaxı rayon sakini Şahin Məmmədov, Siyəzən rayon sakini Fərid Vəliyev və Sumqayıt şəhər sakini Emil Əliyev saxlanılıblar. Onlardan 6 ov tüfəngi götürülüb və hər birinə inzibati qaydada 1000 manat məbləğində cərimə tətbiq edilib.

Mətbuat xidmətinin verdiyi daha bir məlumatda bildirilir ki, Ekologiya və Təbii Sərvətlər Nazirliyinin Su Hövzələrində Bioloji Resursların Artırılması və Mühafizəsi Departamentinin əməkdaşları Xəzər dənizinin Bağlar qəsəbəsi (Sumqayıt) istiqamətində qadağan olunmuş sintetik torla balıq ovlayan şəxsləri saxlayıblar. Araşdırma zamanı icazəsiz ov edənlərin Sumqayıt şəhər sakinləri Kamran Xudaverdiyev və İlham İsmayılov olduğu müəyyən edilib, onlardan balıq və ov alətləri götürülüb. Faktla bağlı tədbir görülməsi üçün toplanmış sənədlər Sumqayıt Şəhər Məhkəməsinə göndərilib.