Rusiya: yaşlıların 60, gənclərin 26 faizi mətbuat oxuyur
Rusiyanın “Romir” tədqiqat holdinqi əhalinin çap mediasına marağını araşdırıb. Novator.az-ın məlumatına görə, tədqiqat rusiyalılarının 53%-nin mətbuatı izlədiyini üzə çıxarıb.
Tədqiqata əsasən, Rusiya əhalisinin 54,3%-i həftəlik qəzet və jurnallara üstünlük verir, 53%-i gündəlik mətbuatı izləyir. Ayda bir dəfə işıq üzü görən nəşrləri əhalinin 49,7%-i alır.
Nəticələrə görə, mətbuata yüksək gəlirli qrupunun nümayəndələri daha çox diqqət yetirir: onların 58,4%-i həftəlik, 57,1%-i gündəlik, 53,3%-i aylıq nəşrləri oxuyur.
Orta qazanclı respondentlərin 51%-i, aşağı gəlirli qrup nümayəndələrinin 46,8%-i həftəlik nəşrləri mütaliə edir. Ayda bir dəfə çıxan qəzet və jurnalları orta qazanclı respondentlərin 46%-i, aşağı gəlirli qrupun nümayəndələrinin 46,5%-i alır. Hər iki qrupun nümayəndələrinin 49%-i gündəlik mətbuata üstünlük verir.
Araşdırma göstərib ki, dövrü mətbuatı ən əz izləyən təbəqə yaşı 20-dən aşağı olan gənclərdir. Bu yaş qrupu nümayəndələrinin 39,6%-i əsasən aylıq nəşrləri alıb oxuyur. Onların 26,7%-i gündəlik mətbuata üstünlük verir.
Yaşı 50-ni keçən respondentlərin daha fəal oxucular olduğu üzə çıxıb. Onların 62,3%-i həftəlik, 60,5%-i gündəlik mətbuatı oxuyur.
Səidə Hüseynova
