Mədət Quliyev yeni pillədə
Dövlət Təhlükəsizliyi Xidmətinin rəisi Mədət Quliyevə general-polkovnik ali hərbi rütbəsi verilib. Sərəncamı prezident İlham Əliyev sentyabrın 26-da imzalayıb.
Novator.az bildirir ki, Mədət Quliyev 1958-ci ildə Gəncə şəhərində anadan olub. Azərbaycan Dövlət Bədən Tərbiyəsi və İdman Akademiyasını və Daxili İşlər Nazirliyinin Polis Akademiyasını bitirib.
1983-cü ildən daxili işlər orqanlarında xidmət edən Mədət Quliyev DİN-in üç müxtəlif idarəsinin və İnterpolun Milli Mərkəzi Bürosunun rəisi vəzifələrində çalışıb.
2011-ci ildən ədliyyə nazirinin müavini, Penitensiar Xidmətin rəisi olub.
2015-ci il oktyabrın 20-də milli təhlükəsizlik nazirinin birinci müavini, dekabrın 14-də isə Dövlət Təhlükəsizliyi Xidmətinin rəisi təyin edilib.
Azərbaycanın Milli Qəhrəmanı, 2-ci dərəcəli “Vətənə xidmətə görə” ordeni laureatıdır.
2005-ci ildə polis general-mayoru, 2012-ci ildə ədliyyə general-leytenantı, 2015-ci ildə general-leytenant ali hərbi rütbəsi alıb.
