Ermənistanın xarici işlər naziri Zöhrab Mnasakanyan sentyabrın 25-i Nyu-Yorkda ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa), Endrü Skofer (ABŞ) və ATƏT sədrinin şəxsi nümayəndəsi Anjey Kasprşiklə görüşüb. Novator.az-ın məlumatına görə, nazir ölkəsinin Dağlıq Qarabağ münaqişəsinin dinc yolla həllinə hazır olduğunu iddia edib və Azərbaycandan gileylənib, son bir neçə gündə atəşkəsin pozulması nəticəsində iki erməni hərbi qulluqçusunun öldüyünü vurğulayıb.

Sentyabrın 26-da erməni nazir azərbaycanlı həmkarı Elmar Məmmədyarovla bir araya gələcək.

1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ildə atəşkəslə dayanan müharibədə Ermənistan Dağlıq Qarabağı və onun ətrafındakı yeddi rayonu işğal edib.

Dağlıq Qarabağ münaqişəsinin dinc yolla tənzimlənməsi üçün 1992-ci ildə yaradılan ATƏT-in Minsk qrupunda həmsədr ölkələr, eləcə də Azərbaycan və Ermənistanla yanaşı Belarus, Almaniya, İtaliya, İsveç, Finlandiya, Türkiyə də təmsil olunur.