Sorğu: 56% Merkelin getməsini istəyir
Almaniyanın “İnsa” sosioloji mərkəzi kansler Angela Merkellə bağlı sorğu keçirib. Novator.az xəbər verir ki, “Bild” qəzetində dərc olunan nəticələrə görə, respondentlərin 56%-i Angela Merkelin istefasını istədiyini deyib.
Sorğuya qatılanların 47%-i növbədənkənar parlament seçkisinin keçirilməsinə tərəfdar olub və yalnız 24%-i Angela Merkelin yenidən hökumət başçısı postuna seçilməsini arzulayıb.
1954-cü il təvəllüdlü Angela Merkel 2000-ci ildən Xristian Demokrat İttifaqının sədridir. 1991-1994-cü illərdə qadınlar və gənclər naziri, 1994-1998-ci illərdə ətraf mühit və təbiətin mühafizəsi naziri postlarını tutub, 2005-ci ildən Almaniya kansleridir.
2017-ci il sentyabrın 24-də keçirilmiş son parlament seçkisindən sonra uzun koalisiya danışıqları gedib, Xristian Demokrat və Xristian Sosial ittifaqları alyansı ilə Sosial Demokrat Partiyası birgə hökumət qurub.
2018-ci ilin martın 14-ü Almaniya parlamenti Angela Merkeli yenidən federal kansler postuna seçib.
Almaniyada parlament seçkisi 4 ildən bir keçirilir. Növbəti seçki 2021-ci ilin payızında olmalıdır.
Səidə Hüseynova
