104 ölkə üzrə araşdırma: 1,3 milyard adam çox yoxsuldur
BMT-nin İnkişaf Proqramı 2018-ci il üzrə kompleks yoxsulluq indeksini açıqlayıb. Novator.az-ın məlumatına görə, Oksford Yoxsulluq və İnsan İnkişafı Təşəbbüsü ilə birgə aparılmış tədqiqatın nəticələri 1,3 milyard adamın çox yoxsul yaşadığını göstərib. Bu, araşdırmanın aparıldığı 104 ölkənin ümumi əhalisinin dörddə bir hissəsi deməkdir.
Tədqiqatçılar yoxsulların 46%-nin həddindən artıq yoxsul olduğunu qeyd edir, 879 milyon nəfərin isə yoxsulluq həddinə çatdığını vurğulayır.
Hesabat müəllifləri yoxsulluq içində yaşayan 662 milyon adamın yetkinlik yaşına çatmayan şəxslər olduğunu bildirir.
Məruzəyə görə, Yer kürəsindəki yoxsulların 83%-i Saxaranın cənubundakı Afrika və Cənubi Asiya ölkələrində yaşayır.
Afrika əhalisinin 58%-nin, Cənubi Asiya əhalisinin 31%-nin yoxsul olduğu qeyd edilir.
Səidə Hüseynova
