“Azərenerji”nin rəhbəri niyə dəyişdi?
Sentyabrın 4-də dövlət başçısı İlham Əliyev sərəncam imzalayaraq Etibar Pirverdiyevi “Azərenerji” Açıq Səhmdar Cəmiyyətinin prezidenti vəzifəsindən azad edib.
Digər iki sərəncamla Balababa Rzayev “Azərişıq” Açıq Səhmdar Cəmiyyətinin sədri vəzifəsindən çıxarılaraq “Azərenerji” Açıq Səhmdar Cəmiyyətinin prezidenti təyin olunub.
1964-cü il təvəllüdlü Etibar Pirverdiyev 2001-ci ilin noyabr ayından “Azərenerji” Açıq Səhmdar Cəmiyyətinin prezidenti idi.
Balababa Rzayev 2006-2015-ci illərdə “Bakıelektrikşəbəkə” ASC-yə, 2015-ci ildən isə həmin qurumun bazasında yaradılan “Azərişıq” ASC-yə sədrlik edib.
Bu il iyulun 3-də Azərbaycanın enerji sistemində iki böyük qəza baş vermiş, dövlət başçısı İlham Əliyev iyulun 4-ü bu məsələ ilə bağlı keçirdiyi müşavirədə “Azərenerji” Açıq Səhmdar Cəmiyyətinin prezidenti Etibar Pirverdiyevi sərt tənqid etmişdi: “Siz sadəcə olaraq utanmalısınız, xalq qarşısında, ölkə qarşısında. Bu isti havada insanlara bu qədər əziyyət vermisiniz. Metroda qalanlar, qocalar, uşaqlar, qadınlar, xəstələr, liftlərdə qalanlar. İqtisadiyyata nə qədər böyük ziyan vurmusunuz. Təkcə Neft Şirkətinin ziyanını hesablasaq ölkəyə nə qədər böyük iqtisadi ziyan dəyib. Mən bu sahəyə bu qədər investisiya ayırmışam. Dövlət investisiya proqramında hər il bu məqsədlə böyük vəsait ayrılır. İndi yeni elektrik stansiyaları tikilir. İndi “Şimal-2” elektrik stansiyası tikilir. Son 15 il ərzində 30 stansiya tikilib. Elə bir sistem qurulmalı idi ki, bir qəzaya görə ölkənin enerji sistemi çökməsin. Nə üçün Bakıda, Sumqayıtda, qeyd etdiyim kimi, bölgələrdə istifadəyə verilmiş elektrik stansiyaları o qəza baş verəndən sonra fəaliyyətini dayandırdı?! Siz bunun səbəbləri haqqında danışmalısınız. Bunun izahatını siz verməlisiniz”.
Novator.az bildirir ki, Prezident Administrasiyasının 4 sentyabr məlumatında iyulun 3-də Mingəçevir şəhərində yerləşən “Azərbaycan İstilik Elektrik Stansiyası” Məhdud Məsuliyyətli Cəmiyyətinin yarımstansiyalarından birində cərəyan transformatorunda qəza baş verdiyi xatırladılır: “Qəza nəticəsində Azərbaycanın enerji sistemində ciddi problemlər yaşanıb, Bakı və Gəncə şəhərləri də daxil olmaqla 39 şəhər və rayonun elektrik enerjisi ilə təminatında fasilə yaranıb.
Baş vermiş qəzanın səbəblərini araşdırmaq və nəticələrini aradan qaldırmaq məqsədilə elə həmin gün baş nazirin birinci müavininin rəhbərliyi ilə dövlət komissiyası yaradılıb. Ötən müddət ərzində dövlət komissiyası qəzanın başvermə səbəblərini ciddi araşdırıb, çatışmazlıqlar və problemlər, habelə qəzanı doğuran hallar da əks olunan geniş rəy hazırlayaraq prezidentə təqdim edib.
Hazırlanmış rəydə baş vermiş qəzanın əsas səbəblərindən biri kimi “Azərenerji” Açıq Səhmdar Cəmiyyətinin qəzaya lazımi səviyyədə hazır olmaması, fəaliyyətində mövcud olan texniki və bir sıra digər çatışmazlıqlar üzündən qəzaya adekvat reaksiya verə bilməməsi, habelə nəticədə ölkənin enerji sistemində qəzaya gətirib çıxaran bir sıra digər nöqsanlara yol verdiyi qeyd olunub.
Prezident dövlət komissiyasının yekun rəyi ilə tanış olub və işdə yol verdiyi nöqsanlara görə “Azərenerji” Açıq Səhmdar Cəmiyyətinin prezidenti Etibar Pirverdiyevi tutduğu vəzifədən azad edib”.
Qəzanın fəsadları
Qəza ilə bağlı komissiya yaradıldı
Bakı metrosuz qalıb
Prezident Administrasiyasının məlumatı
Metro işə düşüb
Enerji müşavirəsində sərt sözlər
Mingəçevir stansiyasında üçüncü qəza
Xəbərdarlıqlar, tapşırıqlar
Bəzi yerlərdə işıqlar yenə sönüb
