Yuri Xaçaturova da iş qaldırıldı
Ermənistanın Xüsusi İstintaq Xidməti 1 mart 2008-ci il qırğınının istintaqına cəlb etdiyi Kollektiv Təhlükəsizlik Müqaviləsi Təşkilatının baş katibi Yuri Xaçaturova cinayət işi qaldırıb. Novator.az bildirir ki, iyulun 27-də yayılan rəsmi açıqlamaya görə, Yuri Xaçaturova bir qrup şəxslə qabaqcadan əlbir olmaqla dövlətin konstitusiya quruluşunu zorla dəyişdirmə ittihamı irəli sürülüb, həbsi üçün məhkəməyə vəsatət verilib.
Yuri Xaçaturov 1952-ci ildə Gürcüstanda anadan olub. Tbilisi Artilleriya Komanda Məktəbinin məzunudur. Uzun illər sovet ordusunda xidmət keçib.
1992-ci ildən Ermənistan ordusunda xidmətə başlayan Yuri Xaçaturov Azərbaycan torpaqlarının işğalında iştirak edib. General-polkovnikdir. Müdafiə nazirinin müavini, Ermənistan Silahlı Qüvvələri Baş Qərargahının rəisi, Milli Təhlükəsizlik Şurasının katibi olub.
2017-ci ildən Kollektiv Təhlükəsizlik Müqaviləsi Təşkilatının (bu quruma Rusiya, Belarus, Ermənistan, Qazaxıstan, Qırğızıstan, Tacikistan daxildir) baş katibidir.
İyulun 26-da Yuri Xaçaturov Xüsusi İstintaq Xidmətində 1 mart 2018-ci il hadisələri ilə bağlı şahid ifadəsi verib. O, həmin hadisələr zamanı müdafiə nazirinin müavini postunu tutub.
2008-ci il fevralın 19-da Ermənistanda prezident seçkisi keçirilib. Mərkəzi Seçki Komissiyası baş nazir Serj Sərkisyanı qalib elan edib. Əsas namizədlərdən olan birinci prezident Levon Ter-Petrosyanın tərəfdarları paytaxt Yerevanda seçkinin rəsmi nəticələrinə davamlı etiraz aksiyaları keçiriblər. Martın 1-də aksiyalar hərbi güclə dağıdılıb, 8 mülki şəxs, 2 polis əməkdaşı həlak olub.
2008-ci ildə prezident postunu tutmuş Robert Köçəryana, müdafiə naziri olmuş Mikael Arutunyana da cinayət işi qaldırılıb.
Şamaxılı erməni general axtarışa verildi
