Paytaxt prokurorluğunun hesabatında nələr var?
2018-ci ilin ilk yarısında Bakı şəhərində 5800-dən çox cinayət hadisəsi qeydə alınıb. Bakı Şəhər Prokurorluğunda keçirilmiş əməliyyat müşavirəsində belə deyilib.
25 iyul müşavirəsində hesabat məruzəsi ilə çıxış edən Bakı şəhər prokuroru İlqar Abbasov bu ilin yanvar-iyun aylarında paytaxtda 5854 cinayət hadisəsinin qeydə alındığını vurğulayıb: “Ötən ilin müvafiq dövrü ilə müqayisədə prokurorluq və daxili işlər orqanları üzrə qeydə alınmış cinayətlərin açılma səviyyəsi 2,2 faiz artaraq 82,1 faiz, ağır və xüsusilə ağır cinayətlərin sayı 38,5 faiz azalaraq 658 olub.
İlin birinci yarısı ərzində qeydə alınmış 31 qəsdən adamöldürmə cinayətinin, o cümlədən qeyri-aşkarlıq şəraitində törədilmiş qəsdən adamöldürmə cinayətlərinin, eləcə də 16 qəsdən adam öldürməyə cəhd cinayətinin hamısının açılması təmin edilib.
Hesabat dövründə 37 quldurluq hadisəsi baş verib, onlardan bağlı qalanı olmayıb. Ölümlə nəticələnən 115 yol-nəqliyyat hadisəsi qeydə alınıb. Həmin hadisələrdən biri bağlı qalıb.
Hesabat dövründə prokurorluqda 607 işdən 256-sı, daxili işlər orqanlarının istintaq aparatlarının icraatında olan 7106 cinayət işindən 2312-nin istintaqı tamamlanıb.
Yanvar-iyun aylarında baş vermiş cinayətlər nəticəsində prokurorluqda, o cümlədən Bakı Şəhər Prokurorluğunun İstintaq İdarəsində aparılan cinayət işləri üzrə fiziki və hüquqi şəxslərə vurulmuş 2 milyon 182 min manat maddi ziyandan 30,2 faizi, polis orqanlarında aparılan işlər üzrə isə vurulmuş 13 milyon 960 min manat maddi ziyandan 90,5 faizi istintaq zamanı ödətdirilib.
6 ayda şəhər prokurorluğu orqanlarına 8164 müraciət daxil olub. Həmin müraciətlərdən 1916-sı həllini tapıb, o cümlədən 706 müraciət təmin edilib”.
Əməliyyat müşavirəsində bildirilib ki, hesabat dövründə şəhər prokurorluğunun 4 əməkdaşı intizam məsuliyyətinə cəlb olunub, onların 1-i tutduğu vəzifədən azad edilib.
Xəbəri Baş Prokurorluğun mətbuat xidməti yayıb.
