Hər şey Bakıya qaldı
UEFA Çempionlar Liqasında Azərbaycanı təmsil edən “Qarabağ” klubu 2-ci raundun ilk oyununu keçirib. Novator.az-ın məlumatına görə, ağdamlılar iyulun 25-i Albaniyada “Kukesi” komandasına qonaq olublar. Matç qolsuz bitib.
Cavab oyunu avqustun 1-i Bakıda, Tofiq Bəhramov stadionunda olacaq.
“Qarabağ”ın baş məşqçisi Qurban Qurbanov jurnalistlərə açıqlamasında Albaniyadakı matçın ağır oyun olduğunu vurğulayıb: “Futbolçular çox güc sərf etdi. Səfərdə oynadığımız üçün belə nəticəni gözləyirdik. Rəqibimiz meydanda olduqca intizamlı idi, qol buraxmaq istəmirdi.
Məcburuq ki, cavab matçında dəyişikliklər edib qol vuraq. Belə oyunlarda bu nəticəni qənaətbəxş saymaq olar. Bakıdakı oyunda mərhələni keçmək üçün əlimizdən gələni edəcəyik”.
Mərhələ adlayacağı halda “Qarabağ” BATE (Belarus) – HİK (Finlandiya) cütlüyünün qalibinə rəqib olacaq. Bu komandaların ilk oyununda hesab açılmayıb.
3-cü mərhələ 7-15 avqust aralığına təyin edilib.
“Kukesi” səddini aşa bilməsə, “Qarabağ” Avropa Liqasına ələnib 3-cü mərhələdə “Torpedo” (Gürcüstan) – “Vikinqur” (Farer adaları) görüşünün qalibi ilə oynayacaq.
