Prezident İlham Əliyev iyulun 20-si Parisdə Fransa Milli Assambleyasının sədri Fransua de Rüji ilə görüşüb. AZƏRTAC xəbər verir ki, görüşdə Azərbaycanla Fransa arasında ikitərəfli münasibətlərin, o cümlədən parlamentlərarası əlaqələrin uğurla inkişaf etməsindən məmnunluq ifadə olunub.

İlham Əliyev Azərbaycanla Fransanın 15 şəhərinin qardaşlaşdığını qeyd edib. Prezident vurğulayıb ki, bu, iki ölkə arasında münasibətlərin səviyyəsini göstərir və regionlar arasındakı təmasların inkişaf etməsinə imkanlar açır.

Görüşdə həmçinin Azərbaycan-Fransa əlaqələrinin Azərbaycan-Avropa İttifaqı əməkdaşlığı baxımından önəmi qeyd edilib.

Söhbət zamanı iki ölkə arasında siyasi, iqtisadi, mədəni sahələrdə münasibətlərin inkişafı, bu sahələrdə gələcək layihələrin reallaşdırılması məsələləri ətrafında fikir mübadiləsi aparılıb, Azərbaycanın Fransada daha geniş tanıdılması istiqamətində işlərin genişləndirilməsinin zəruriliyi vurğulanıb.

Görüşdə Ermənistan-Azərbaycan, Dağlıq Qarabağ münaqişəsinə də toxunulub.