Dövlət başçısı İlham Əliyev Vergi Məcəlləsinə dəyişiklikləri imzalayıb. Novator.az-ın məlumatına görə, qanun fiziki şəxsin fərdi istehlakı üçün alkoqollu içkinin və siqaretin aksizdən azad olunması qaydasını yeniləyir. İndiyə qədər 3 litr alkoqollu içki, 600 ədəd siqaret aksizdən azad idi. Vergi Məcəlləsinə dəyişikliklə bu miqdar 1,5 litrə və 200 ədədə düşürülür.

Başqa bir yeniliyə əsasən, alkoqollu içkilərə aksiz markasının verilməsinə görə 6 qəpik, tütün məmulatlarına aksiz markasının verilməsinə görə 5 qəpik dövlət rüsumu tutulacaq.

Novator.az xatırladır ki, iyulun 1-dən aksizli malların vergi dərəcələri dəyişib. Siqarlar, ucları kəsilən siqarlar və nazik siqarlar üzrə aksiz dərəcəsi 1000 ədədinə 10 manatdan 20 manata, tütündən hazırlanan siqaretlər və onun əvəzediciləri üzrə aksiz dərəcəsi 1000 ədədinə 4 manatdan 12 manata qaldırılıb.