Dünya əhalisi: yeni statistika, proqnozlar
İyulun 11-də qeyd olunan Ümumdünya Əhali Günü dalğasında bəzi rəqəmlər açıqlanıb. Novator.az-ın məlumatına görə, Almaniyanın Yer Əhalisi Fondunun yaydığı hesabatda bildirilir ki, dünya əhalisinin sayı 2017-ci illə müqayisədə 83 milyon nəfər artaraq 7 milyard 635 milyonu ötüb. Hər 10 saniyədə 26 uşağın doğulduğu qeyd olunur.
Fondun ekspertləri əhali artımının əsasən Afrika ölkələrində müşahidə olunduğunu vurğulayırlar. 2050-ci ilə qədər Afrika qitəsində əhalinin sayının 1,3 milyard nəfərdən 2,5 milyarda artacağı proqnozlaşdırılır.
Eurostat-ın məlumatında bildirilir ki, 2018-ci ilin yanvarın 1-nə Avropa İttifaqının əhalisi 512,6 milyon nəfər olub. Həmin dövrə Avropa İttifaqında ən çox əhalisi olan ölkə kim Almaniya göstərilir: 82,9 milyon nəfər. Əhali sayına görə Avropa İttifaqının ikinci ölkəsi Fransa (67,2 milyon nəfər), üçüncü ölkəsi Böyük Britaniyadır (66,2 milyon nəfər).
BMT-nin hesabatına əsasən, 2030-cu ilə şəhər sakinlərinin sayı 1 milyard nəfər artaraq 5,2 milyard nəfərə çata bilər. Bu, planet əhalisinin 60%-i demək olacaq. Hazırda dünyada əhalisinin sayı 1 milyon nəfəri keçən 548 şəhər var. Onların 33-nün əhalisi 10 milyon nəfərdən artıqdır.
Əhali sayına görə ən böyük şəhərin 37 milyon insanın yaşadığı Yaponiyanın paytaxtı Tokio olduğu vurğulanır. Hindistanın paytaxtı Nyu-Dehlidə 29 milyon, Çinin Şanxay şəhərində 26 milyon insanın yaşadığı qeyd olunur.
Səidə Hüseynova
