Cəbhə xəttində
Azərbaycan Ordusunun təlimləri ilə bağlı yeni məlumat açıqlanıb. Müdafiə Nazirliyi bildirir ki, iyulun 5-nə keçən gecə genişmiqyaslı təlimlərin döyüş atışlı daha bir mərhələsi keçirilib: “Bu mərhələdə qoşunlar şərti düşmənin bütün hədəflərini məhv ediblər. Gecə vaxtı və məhdud görmə şəraitində keçirilən təlimlərdə motoatıcı, tank, raket-artilleriya, zenit-raket bölmələri, eləcə də aviasiya vasitələri döyüş atışları gerçəkləşdiriblər”.
İyulun 2-dən keçirilən təlimlərə 20 min nəfərədək şəxsi heyət, 120-dək tank və digər zirehli texnika, 200-dən artıq müxtəlif çaplı raket və artilleriya qurğusu, yaylım atəşli reaktiv sistemləri və minaatan, 30-dək müxtəlif təyinatlı ordu və cəbhə aviasiyası cəlb olunub.
Mod.gov.az-da iyulun 5-də yayılan başqa bir məlumata görə, müdafiə naziri general-polkovnik Zakir Həsənov cəbhənin ön xəttində inşa edilmiş infrastrukturun açılışına qatılıb: “Yeni qərargah binası, əsgər yataqxanası və yeməkxanada yaradılan şəraitlə tanış olan müdafiə naziri hərbi qulluqçuların sosial-məişət şəraitlərinin daha da yaxşılaşdırılması ilə bağlı tapşırıqlar verib”.
