Metro işə düşüb
İyulun 4-ü saat 13:10-dan Bakı metrosu fəaliyyətini bərpa edib. Xəbəri APA-Economics “Bakı Metropoliteni” QSC-nin mətbuat xidmətinə istinadla yayıb.
İyulun 3-də Mingəçevir şəhərində yerləşən “Azərbaycan İstilik Elektrik Stansiyası” MMC-nin yarımstansiyalarından birində cərəyan transformatorunda qəza olub. Bununla əlaqədar Bakı və Gəncə şəhərləri də daxil olmaqla ölkənin 39 şəhər və rayonunun elektrik enerjisi ilə təminatında fasilə yaranıb.
İyulun 3-ü saat 19 radələrində elektrik enerjisində yaranan fasilə ilə əlaqədar Bakı metrosu bağlanıb. Metronun stansiyalarındakı və tuneldə qalan qatarlardakı sərnişinlər çıxarılıb.
Qatarların hərəkətini təmin etmək üçün elektrik enerjisinin verilişində dayanıqlılıq olmadığından Bakı Metropoliteni iyulun 4-ü günortayadək fəaliyyət göstərməyib.
