Ermənistan Milli Təhlükəsizlik Xidmətinin direktoru Artur Vanetsyan dünya ermənilərini birləşdirən “Ayastan” fondunun direktoru Ara Vardanyanın nədə günahlandırıldığını açıqlayıb.

1992-ci ildə yaradılmış “Ayastan” fondu indiyədək Ermənistanda və Dağlıq Qarabağda müxtəlif layihələrin gerçəkləşdirilməsi üçün 350 milyon dollara yaxın vəsait toplayıb.

“Ayastan” fondunun Himayəçilik Şurasına Ermənistan prezidenti başçılıq edir.

İyulun 2-də Milli Təhlükəsizlik Xidmətinin saxladığı Ara Vardanyan fondun vəsaitlərini şəxsi məqsədlər üçün istifadədə şübhəli bilinir. Novator.az-ın məlumatına görə, Milli Təhlükəsizlik Xidmətinin direktoru Artur Vanetsyan iyulun 4-də bəyan edib ki, Ara Vardanyan “Ayastan” fonduna məxsus vəsaitlərdən kazinoya 130 milyon dram (269,3 min dollar) pul qoyub.

Ara Vardanyan Milli Təhlükəsizlik Xidmətinə ifadəsində “Ayastan” fondundan aldığı kredit kartından 25 milyon dramı (51,8 min dollara yaxın) şəxsi məqsədlər üçün xərclədiyini, o cümlədən kazinoya qoyduğunu etiraf edib.