Riskli hava
Ekologiya və Təbii Sərvətlər Nazirliyinin Milli Hidrometeorologiya Departamenti iyulun 3-ü və 4-ü ölkədə anomal qızmar hava şəraitinin davam edəcəyini açıqlayıb. Rəsmi məlumata görə, Bakıda və Abşeron yarımadasında havanın maksimal temperaturunun 40-43, Aran rayonlarında və Naxçıvan Muxtar Respublikasında 40-44, bəzi yerlərdə 46, Qazax-Gəncə zonası, Böyük Qafqaz, Lənkəran-Astara rayonlarında 38-42, dağlıq rayonlarda 28-33 dərəcə olacağı gözlənir.
Sinoptiklərin tibbi-meteoroloji xəbərdarlığına əsasən, iyulun 3-4-də Abşeron yarımadasında isti hava dalğası ilə bağlı qızmar temperatur diskomfortu əksər əhali üçün əlverişsiz, meteohəssas insanlar üçün risklidir. Gündüz saatlarında uzun müddət açıq havada olmaq məsləhət görülmür.
İyulun 1-i Bakıda və Abşeron yarımadasında son 120 ilin rekord temperaturu qeydə alınıb: havanın hərarəti 43-44 dərəcəyə çatıb. Ötən gün Bakıda və Abşeron yarımadasında şimal küləyi temperaturun bir qədər aşağı enməsinə səbəb olub.
İyulun 5-dən 8-dək arabir güclənən şimal küləyinin müsbət amil olacağı və havanın temperaturunun iqlim norması göstəricilərinə yaxınlaşacağı bildirilir.
