İyulun 3-nə keçən gecə Mingəçevir İstilik Elektrik Stansiyasının əsas düyün yarımstansiyasında yanğınla nəticələnən qəza baş verib, ölkə işıqsız qalıb. Energetika Nazirliyi ilə “Azərenerji” ASC-nin birgə operativ məlumatına əsasən, bir neçə gündür havaların normadan artıq isti keçməsi nəticəsində elektrik enerjisinə tələbat kəskin şəkildə artıb və elektrik avadanlıqlarının istismarında açılmalar baş verib: “İlkin ehtimala görə, Mingəçevir İstilik Elektrik Stansiyasının əsas düyün yarımstansiyasında baş vermiş açılma səbəbindən sistemdə qəza açılması qaçılmaz olub”.

Təmir işlərinin ardınca elektrik enerjisinin verilişi mərhələli şəkildə bərpa edilir. Energetika naziri Pərviz Şahbazov bəyan edib ki, bütün strateji əhəmiyyətli obyektlər elektrik enerjisi alır.

Qəza səbəbindən bölgələrdən Bakı sərnişin stansiyasına gələn sərnişin qatarlarının hərəkətində gecikmələr qeydə alınıb. “Azərbaycan Dəmir Yolları” Qapalı Səhmdar Cəmiyyəti ictimaiyyətlə əlaqələr şöbəsinin rəisi Sevinc Qədirova AZƏRTAC-a deyib ki, elektrik enerjisinin verilməsində yaranan problemə görə iyulun 3-də günün birinci yarısında Bakı-Sumqayıt-Bakı marşrutunda hərəkət edən elektrik qatarları işləməyəcək.

Elektrik enerjisinin kəsintisi bütün ölkə boyu su təchizatına mənfi təsir göstərib. “Azərsu” ASC-nin ictimaiyyətlə əlaqələr şöbəsinin rəisi Anar Cəbrayıllı deyib ki, elektrik enerjisinin kəsilməsi ilə əlaqədar bütün sutəmizləyən qurğuların fəaliyyəti dayanıb.