Rusiyalılar ən çox hara köçmək istəyir?
Rusiya İctimai Rəyi Öyrənmə Mərkəzi xaricə köçmək mövzulu sorğu keçirib. Novator.az-ın məlumatına görə, sorğu həmişəlik xaricə köçmək istəyən 18-24 yaş arası gənclərin sayının son 5 ilin ən yüksək həddinə çatdığını üzə çıxarıb. Gənclərin 31%-i xaricə köçmək istəyində olduğunu deyib. 2013-cü ildə də Rusiya İctimai Rəyi Öyrənmə Mərkəzinin analoji sorğusunda respondentlərin 31%-i xaricə köçmək istəyini ifadə etmişdi.
Hesabata əsasən, 2014-2017-ci illərdə 18-24 yaş arası gənclərin 21-26% i mühacirət arzusunda olduğunu dilə gətirib.
Nəticələri 2018-ci il iyulun 2-də açıqlanan yeni sorğuda ümumilikdə respondentlərin 10%-i başqa ölkədə daimi yaşamaq üçün Rusiyadan getməyə hazır olduğunu bəyan edib.
Almaniya rusiyalıların alternativ yaşayış yeri üçün arzuladığı ölkələr içində liderdir. Rusiyanı tərk etməyə hazır olan respondentlərin 16%-i Almaniyaya getmək istədiyini vurğulayıb. İlk üçlükdə ABŞ (respondentlərin 7%-i) və İspaniya da (respondentlərin 6%-i) yer alıb.
Sorğu iştirakçılarının 5%-i Kanadaya, 4%-i isə İtaliyaya mühacirət etmək istədiyini bildirib.
Səidə Hüseynova
