İki polis zabiti ali rütbələr aldı
Prezident İlham Əliyev Daxili İşlər Nazirliyinin iki zabitinə ali rütbələr verib. Naxçıvan Muxtar Respublikasının daxili işlər naziri general-mayor Fazil Ələkbərov general-leytenant ali hərbi rütbəsi alıb.
Novator.az-ın məlumatına görə, Fazil Ələkbərov 1971-ci ildə Naxçıvan Muxtar Respublikasının Şərur rayonunun Arbatan kəndində anadan olub. Naxçıvan Dövlət Universitetinin hüquq fakültəsini bitirib.
1992-2010-cu illərdə Naxçıvan Muxtar Respublikası Daxili İşlər Nazirliyinin ayrı-ayrı struktur qurumlarında müxtəlif vəzifələrdə işləyib. 2010-2015-ci illərdə Naxçıvan Muxtar Respublikası Dövlət Miqrasiya Xidmətinin rəisi, 2015-2017-ci illərdə Naxçıvan Muxtar Respublikası Dövlət Təhlükəsizliyi Xidmətinin rəisi vəzifələrində çalışıb.
2017-ci il avqustun 25-dən Naxçıvan Muxtar Respublikasının daxili işlər naziridir.
Polkovnik Heydər Heydərova polis general-mayoru ali xüsusi rütbəsi verilib.
Heydər Heydərov Daxili İşlər Nazirliyinin İnsan Alverinə Qarşı Mübarizə Baş İdarəsinin rəisidir.
1959-cu il təvəllüdlü Heydər Heydərov Neft və Kimya İnstitutunu və Daxili İşlər Nazirliyinin Polis Akademiyasını bitirib.
1986-cı ildən daxili işlər orqanlarında xidmət edir. Daxili İşlər Nazirliyinin Daxili Təhlükəsizlik Xidmətinin rəisi olub.
İyulun 2-si Azərbaycanda Polis Günü kimi qeyd olunur.
