Prezident İlham Əliyev idxal-ixrac əməliyyatlarına nəzarət sistemi planını təsdiq edib. Novator.az-ın məlumatına görə, iyunun 28-də imzalanan sərəncamda Nazirlər Kabinetinə tədbirlər planının icrasını aidiyyəti dövlət orqanları ilə əlaqələndirmək və görülmüş işlər barədə rübdə bir dəfə prezidentə məlumat vermək tapşırılıb.

Plana idxal olunan malların elektron formada əvvəlcədən bəyan edilməsi sisteminin tətbiqi; gömrük prosedurlarının sadələşdirilməsi və gömrük rəsmiləşdirilməsi prosesində “Bir pəncərə” sisteminə qoşulan dövlət orqanları arasında sənəd mübadiləsinin təkmilləşdirilməsi; gömrük sərhədindən keçirilən malların və nəqliyyat vasitələrinin eyniləşdirilməsi vasitələrinə birgə nəzarət; gömrük sərhədindən keçirilən mallara və nəqliyyat vasitələrinə görə gömrük bəyannaməsinin, təkrar ixrac bildirişinin və ya qısa ixrac bəyannaməsinin yalnız elektron formada təqdim edilməsi (fiziki şəxslərin istehsal və ya kommersiya məqsədləri üçün nəzərdə tutulmayan malları gömrük sərhədindən keçirməsi halları istisna olmaqla); vergi və gömrük ödənişlərindən azad olunma hallarına nəzarət mexanizminin təşkili; gömrük sərhəd-keçid məntəqələrindən mal və nəqliyyat vasitələrinin keçidinin sürətləndirilməsi məqsədilə beynəlxalq standartlara uyğun nəzarət avadanlığının tətbiqi; rüsumsuz ticarət mağazalarına nəzarətin təşkilində vergi orqanlarının iştirakı; kənd təsərrüfatı mallarının ixracı prosedurlarının sadələşdirilməsi; xarici ticarətin gömrük statistikasının təkmilləşdirilməsi və başqa məsələlər daxildir.

Bu il aprelin 20-də prezident idxal-ixrac əməliyyatlarına nəzarət sisteminin təkmilləşdirilməsi ilə bağlı tədbirlər haqqında sərəncam imzalayıb. Sərəncamda bir sıra idxal-ixrac əməliyyatları üzrə Dövlət Gömrük Komitəsi və Vergilər Nazirliyinin birgə nəzarət mexanizminin tətbiqi məqsədəuyğun sayılıb.