Ən varlı ailə “Walmart” şəbəkəsinə nəzarət edir (Siyahı)
“Bloomberg” agentliyi dünyanın ən varlı 25 ailəsinin siyahısını açıqlayıb. 25 ailənin ümumi varidatının 1,1 trilyon dollar olduğu bildirilir.
Novator.az-ın məlumatına görə, siyahının lideri 12 min super-marketdən ibarət “Walmart” şəbəkəsinə nəzarət edən Uolton ailəsidir (ABŞ). Ailənin 151,5 milyard dollar varidatı var.
Sem Uolton ilk mağazasını 1945-cı ildə əldə edib.
Varlı ailələr reytinqinin ikinci pilləsində 98,7 milyard dollar var-dövlətə sahib olan Fred Koxun oğlanları Çarlz və Devid (ABŞ) gəlir.
Fred Kox 1940-cı ildə “Koch İndustries” kimyəvi korporasiyasını təsis edib.
Siyahının üçüncü pilləsində 89,7 milyard dollar varidatla 1911-cı ildə ABŞ-da “Mars” şirniyyat şirkətini yaradan Frenk Marsın varisləri göstərilib.
Dünyanın ən varlı ailələrinin dördüncü pilləsində “Anheuser-Busch İnBev” pivə şirkətinə sahiblik edən üç belçikalı sülalə – Van Damm, De Mevius və De Şpelberx qərarlaşıb (54,1 milyard dollar).
Beşinci pillədə 49,2 milyard dollar varidatla “Hermes” moda evinin fransalı sahibləri – Düma ailəsi yer alır.
Siyahıda 43,4 milyard dollarlıq var-dövlətə malik “Reliance İndustries” holdinqinin sahibləri – Ambani ailəsinin (Hindistan), 38,8 milyard dollarla “Aldi” super-marketlər şəbəkəsinin sahibi Albrext ailəsinin (Almaniya), 37,5 milyard dollarlıq varidatı olan “Auchan” super-marketlər şəbəkəsinin yaradıcısı Jerar Mülye və onun nəvələrinin (Fransa), 30,9 milyard dollarlıq var-dövlət sahibləri – “Samsunq” şirkətinin (Cənubi Koreya)yaradıcısı Li Ben Çxolun nəvələrinin də adları yer alır.
Səidə Hüseynova
