Dövlət Neft Fondunda yenilik
Prezident İlham Əliyev Dövlət Neft Fondunun Müşahidə Şurasının tərkibini yeniləyib. Fərmana əsasən, baş nazir Novruz Məmmədov Müşahidə Şurasının üzvü olub. Novruz Məmmədov bu postda aprelin 21-də baş nazirlikdən getmiş Artur Rasizadəni əvəzləyib.
Müşahidə Şurasının digər üzvləri bu şəxslərdir: Valeh Ələsgərov (Milli Məclis sədrinin müavini), Natiq Əmirov (prezidentin iqtisadi siyasət və sənaye məsələləri üzrə köməkçisi-şöbə müdiri), Samir Şərifov (maliyyə naziri), Şahin Mustafayev (iqtisadiyyat naziri), Elman Rüstəmov (Mərkəzi Bankın sədri).
Novator.az bildirir ki, Müşahidə Şurası icraçı direktorun təqdimatına əsasən fondun vəsaitinin istifadə edilməsinin əsas istiqamətlərini (proqramını), onun fəaliyyəti barədə illik hesabatını, habelə fondun illik xərclər smetasının layihəsini nəzərdən keçirir və onlara rəy verir, fondun idarə edilməsi ilə bağlı illik xərclər smetasında nəzərdə tutulmuş əməyin ödənişi fondu daxilində fondun aparatının işçilərinin vəzifələrin təsnifat və dərəcələri üzrə vəzifə maaşlarının məbləğlərini təsdiq edir.
Müşahidə Şurası üzvlərinin fəaliyyəti ictimai əsaslarla həyata keçirilir.
2018-ci il aprelin 1-nə fondun aktivləri 37 milyard 631,7 milyon ABŞ dollarına bərabər olub.
