Avropa Şurasının Parlament Assambleyası (AŞPA) Azərbaycana siyasi məhbus məruzəçisi təyin edib. Azadliq.org-un məlumatına görə, qərar iyunun 25-i Hüquq və İnsan Haqları Komitəsinin iclasında qəbul olunub. İslandiyalı deputat Torhildur Sunna Evarsdottirə “Azərbaycandakı siyasi məhbuslar” hesabatı hazırlamaq tapşırılıb. Torhildur Sunna Evarsdottir iyunun 25-də həmçinin Hüquq və İnsan Haqları Komitəsinin sədri seçilib.

Azərbaycanın bəzi hüquq müdafiəçiləri bəyan edirlər ki, ölkədə 150 nəfərdən çox siyasi məhbus var.

Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.