Türkiyədə iyunun 24-də keçirilmiş prezident və parlament seçkilərinin ilkin nəticələri yenilənib. Novator.az-ın məlumatına görə, prezident seçkisində Ədalət və İnkişaf Partiyasının sədri, dövlət başçısı Rəcəb Teyyub Ərdoğan 52,6% səslə öndədir.

Cümhuriyyət Xalq Partiyasının namizədi Məhərrəm İncə 30,6%, Xalqların Demokratik Partiyasından Səlahəddin Dəmirtaş 8,4%, Yaxşı Partiyanın lideri Maral Akşener 7,3%, Səadət Partiyasının lideri Təməl Qaramollaoğlu 0,9%, Vətən Partiyasının lideri Doğu Perinçek 0,2% nəticə göstərib.

Parlament seçkisinə gəlincə, Ədalət və İnkişaf Partiyası 600 yerlik Böyük Millət Məclisinə 295 mandat, müttəfiqi Milliyyətçi Hərəkat Partiyası 49 mandat qazanıb.

Cümhuriyyət Xalq Partiyası 146, müttəfiqi Yaxşı Partiya 43 mandat əldə edib.

Xalqların Demokratik Partiyası 67 mandat götürüb.

Qəti nəticələr iyulun 5-də açıqlanacaq.