Prezident İlham Əliyev Müdafiə Nazirliyinin 8 hərbi qulluqçusuna ali hərbi rütbələr verib. İyunun 25-də imzalanan sərəncamla general-mayor Ayaz Həsənov general-leytenant hərbi rütbəsi, polkovniklər Fazil Ağalarov, Məmməd Eminov, Elçin Xəlilov, Rauf İsmayılov, Namiq Poladov, Mübariz Rzayev və Niyaməddin Tağıyev general-mayor hərbi rütbəsi alıblar.

Başqa sərəncamla müdafiə naziri Zakir Həsənov, müdafiə nazirinin birinci müavini, Silahlı Qüvvələrin Baş Qərargah rəisi Nəcməddin Sadıqov, müdafiə nazirinin müavini, Əlahiddə Ümumqoşun Ordusunun komandanı Kərəm Mustafayev 1-ci dərəcəli “Rəşadət” ordeni ilə təltif olunublar.

Müdafiə Nazirliyinin hərbi qulluqçularından 6 nəfər 3-cü dərəcəli “Vətənə xidmətə görə” ordeni ilə, 15 nəfər “Vətən uğrunda” medalı ilə, 28 nəfər “İgidliyə görə” medalı ilə, 29 nəfər “Hərbi xidmətlərə görə” medalı ilə təltif edilib.

Novator.az bildirir ki, bu il mayın 20-də Azərbaycan-Ermənistan sərhədinin Naxçıvan Muxtar Respublikası sahəsində şəhid olmuş əsgər Adil Əli oğlu Tatarov “Vətən uğrunda” medalı ilə təltif olunanlar arasındadır.