Bitkiçilikdə 52 faiz artım var (Makroiqtisadi göstəricilər)
Dövlət Statistika Komitəsi makroiqtisadi göstəriciləri açıqlayıb. Novator.az-ın məlumatına görə, hesabatda qeyd olunur ki, bu ilin ilk beş ayında kənd təsərrüfatının ümumi məhsulu 2017-ci ilin yanvar-may ayları ilə müqayisədə 8,5 faiz, o cümlədən bitkiçilik məhsulları istehsalı 52 faiz, heyvandarlıq məhsulları istehsalı 2,5 faiz artıb.
Nəqliyyat sektorunda 2018-ci ilin yanvar-may aylarında 88,7 milyon ton yük və 779,3 milyon sərnişin daşınıb. 2017-ci ilin müvafiq dövrü ilə müqayisədə yük daşınmasında 0,9 faiz, sərnişin daşınmasında 1,4 faiz artım qeydə alınıb.
Əvvəlki ilin yanvar-may ayları ilə müqayisədə göstərilmiş informasiya və rabitə xidmətlərinin həcmi dəyər ifadəsində 6,3 faiz artıb, bu sahədə əldə edilmiş gəlirin 81,1 faizi qeyri-dövlət sektorunun payına düşüb.
Əhalinin gəlirlərinin nominal ifadədə 9,3 faiz artaraq 20 milyard 753,7 milyon manata çatdığı bildirilir.
Maliyyə Nazirliyinə istinadla qeyd edilir ki, yanvar-may aylarında dövlət büdcəsinə 8 milyard 245,2 milyon manat vəsait daxil olub, büdcədən 7 milyard 594,4 milyon manat vəsait xərclənib.
Mərkəzi Bankın məlumatlarına görə, mayın 1-nə ölkənin bank və digər kredit təşkilatlarının kredit portfeli milli valyuta ekvivalentində 11 milyard 815,8 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 14,5 faizinə bərabər olub.
Əhalinin banklardakı əmanətlərinin milli valyuta ekvivalentində məbləği mayın 1-nə 7 milyard 881,3 milyon manat göstərilir.
