Prezident Türkiyədə: TANAP açılır
İyunun 12-də prezident İlham Əliyev TANAP layihəsinin açılış mərasimində iştirak etmək üçün Türkiyəyə gedib. AZƏRTAC xəbər verir ki, Əskişəhər hava limanında dövlət başçısını Türkiyənin meşə və su işləri naziri Veysəl Əroğlu və digər rəsmi şəxslər qarşılayıblar.
Cənub Qaz Dəhlizinin bir hissəsini təşkil edən TANAP-ın çəkilməsi ilə bağlı müqavilə 2012-ci ildə imzalanıb. Kəmərin təməli 2015-ci il martın 17-də qoyulub. Xəzərin Azərbaycan sektorundakı “Şahdəniz-2” yatağından çıxarılan qazı Türkiyəyə və Avropaya nəql edəcək TANAP Türkiyə-Gürcüstan sərhədində Cənubi Qafqaz kəmərinə, Türkiyə-Yunanıstan sərhədində “Trans-Adriatik” (TAP) kəmərinə birləşəcək.
İlkin mərhələdə TANAP-la Türkiyəyə ildə 2 milyard kubmetr qaz nəql olunacaq, sonrakı üç il ərzində bu həcm 6 milyard kubmetrə çatdırılacaq.
