Yalnız lirə güc göstərib
İyunun 11-də ABŞ dolları (1,7 manat), gürcü larisi (0,6932 manat) və Rusiya rublunun (0,0273 manat) rəsmi məzənnələri sabit qalıb.
Novator.az-ın məlumatına görə, Mərkəzi Bank avronun kursunu 2,0057 manata endirib.
Bahalaşan türk lirəsi isə banklara 0,3804 manata satılır (Məzənnələr).
Martın 7-dən ABŞ dollarının rəsmi kursu 1,7 manatdır. Bu, manatın devalvasiyaya uğradığı 21 fevral 2015-ci ildən bəri ən uzun sürən rəsmi məzənnədir.
2015-ci il fevralın 20-də dollar banklara 0,7862 manata satılıb. Bir gün sonra Mərkəzi Bank kəskin kurs dəyişikliyinə qərar verib və rəsmi qiymət 1,05 manata yüksəlib. Dekabrın 21-də ikinci devalvasiya baş verib, rəsmi kurs 1,55 manata qalxıb.
2016-cı il 1,5610 manatla başlayıb, 1,7707 manatla sona çatıb. 2017-ci ilin fevralında ilk devalvasiyadan sonra ən yuxarı rəsmi qiymət qeydə alınıb: 1,92 manat. Dekabrın 13-dən 2018-ci il martın 7-dək isə 1,7001 manat rəsmi məzənnə qüvvədə olub.
Ötən il Dövlət Neft Fondu Mərkəzi Bankın keçirdiyi valyuta hərraclarında 3 milyard 598 milyon dollar satıb. Bu ilin yanvar-may aylarında keçirilmiş hərraclarda Dövlət Neft Fondundan 2 milyard 535,5 milyon ABŞ dolları məbləğində vəsait alınıb.
Mərkəzi Bankın valyuta ehtiyatının həcmi iyunun 1-nə 5 milyard 471,4 milyon dollar olub.
