Prezident İlham Əliyev iyunun 10-da Rusiyanın yeni səfiri Mixail Boçarnikovun etimadnaməsini qəbul edib. AZƏRTAC xəbər verir ki, söhbət zamanı dövlət başçısı Azərbaycanla Rusiya arasında ikitərəfli münasibətlərin siyasi, iqtisadi, energetika, hərbi-texniki, humanitar və bütün digər sahələrdə uğurla inkişaf etdiyini deyib.

Mixail Boçarnikov Rusiya prezidenti Vladimir Putinin ona səfirlik fəaliyyəti dövründə Azərbaycanla əlaqələri daha da möhkəmləndirmək istiqamətində səylər göstərmək barədə tapşırıqlar verdiyini bildirib. O qeyd edib ki, Rusiya-Azərbaycan ikitərəfli münasibətləri bütün sahələrdə uğurla inkişaf edir.

Söhbət zamanı ikitərəfli münasibətlərin perspektivləri ətrafında fikir mübadiləsi aparılıb.

Rusiya prezidenti Vladimir Putin Mixail Boçarnikovu mayın 29-da Azərbaycanda fövqəladə və səlahiyyətli səfir təyin edib. Novator.az bildirir ki, 1948-ci il təvəllüdlü Mixail Boçarnikov Moskva Dövlət Beynəlxalq Münasibətlər İnstitutunu bitirib. 1971-ci ildən diplomatik xidmətdədir. SSRİ-nin Efiopiya və Zimbabve səfirliklərində çalışıb.

1992-1996-cı illərdə Mixail Boçarnikov Rusiyanın Zambiyada fövqəladə və səlahiyyətli səfiri, 1996-1999-cu illərdə Rusiya Xarici İşlər Nazirliyinin Afrika Departamentinin direktoru olub.

1999-2003-cü illərdə Mixail Boçarnikov ölkəsini Yunanıstanda səfir kimi təmsil edib, 2003-2006-cı illərdə xüsusi tapşırıqlar üzrə səfir kimi gürcü-abxaz münaqişəsi ilə məşğul olub.

Mixail Boçarnikov 2006-2018-ci illərdə Qazaxıstanda fövqəladə və səlahiyyətli səfir postunu tutub.